De community ruimte is een vrije online ruimte (blog) waar vrijwilligers en organisaties hun opinies kunnen publiceren. De standpunten vermeld in deze community reflecteren niet noodzakelijk de redactionele lijn van DeWereldMorgen.be. De verantwoordelijkheid over de inhoud ligt bij de auteur.

L7A9D .

رسالة إلى عمر ومي فاتيحة

zaterdag 15 augustus 2020 16:51

Spread the love

عمر روطالا

انا دابا بعيد على سجن عكاشة

حبس صغير وسط الحبس الكبير لي باقيين لي طراس ديالو فيا بخايبهم وزوينهم

بعيد بزاف فقرية فنواحي مدينة بروكسيل

جالس مرتاح وما مرتاحش

بحال شي ريفي ثوري فحرب العصابات منفي فشي حارة فمصر

كيتحرق باش يكون فقلب المعركة

المعركة لي عارف راسو ميت فيها ورغم ذلك باغي يكمل حتى لآخر رمق

بعيد بآلاف الكيلومترات

كنشرب بيرة بلجيكية محلية الصنع

وكنحاول نتذكر أول مرة تلاقينا فيها

ولكن كتخوني الذاكرة

عمر الروطالة،

الراسطة، البولفار، جمعية أطاك

مقرات الأحزاب لي صكواطيناها

بزاف دالصور كيدوزو فراسي بالزربة بحال فدوك السينمات الصغار

ولكن كنتفكر مزيان أول لقاء فني بيننا

في بيت منيماليست بعمارة وسط المدينة

كتب وآلات موسيقية وقليل من الأثاث

ما نساش كيفاش رحبتي بينا

لعبتي بآلة العود أغنية محمد بن عبد الكريم الخطابي وأغاني أخرى للشيخ إمام ومجموعة حنظلة

كتبنا شعارات

وألفنا أغنية للحركة وغنا معنا أستاذ الفلسفة

غنينا للعشرين للثورة للحلم للحرية

وانا كنكتب هاد الكلمات خدمت أغنية ” الميمة باكية ديما ” كلمات الشاعر عبد الله ودان

ما بقى ضحك

ما بقات وناسة

معلوم تظلي عساسة

فالشرجم تسناي خيالو

ولدك يرجع من المدرسة

ولدك أ لالا ما قرا والو

ولدك متبع السياسة

….

ونتي يا لالا كتكُولي قاري

…

ولدك أ لالا رجلو خرجو الشواري

ولدك أ لالا موسخ الدواصا

ولدك أ لالا لازم يتكلاصا

إلخ..

مي فاتيحة

هاد القصيدة تكتبات فعهد السفاح

وما زال كتعبر على الاغتصاب لي كتمارسو علينا الدولة والرأسمالية والرجل الأبيض وما جوارهما

اغتصاب فني

اغتصاب ثقافي

اغتصاب تعليمي

اغتصاب ديني

اغتصاب الفلسفة والفكر النقدي

المسرح والسينما،

حتى دوك السينمات الصغار لي عندنا معاهم ذكريات سدوهم

الأماكن العمومية حتى هي اغتاصبوها

كلشي زفتوه وحتى الشجر قطعوه

قلوبهم ما فيها رحمة اميمتي

تاريخنا

كلو اغتصبوه

ولكن أ ميمتي حنا كلنا ولادك

وولاد كل المغربيات الحرات

لي كيوصلو الكفة لولادهم الأحرار مور الكرية ومكيبكيوش قدامهم

شي نهار غادية تشرق شمس جديدة نقية ودافية فوق بلادنا

فوق جبالنا

فوق ريفنا

فوق بحورنا

فوق حقولنا

وفوق الوشام والتنهيدات الحارة والصبر والمقاومة ديال كل الأمهات

صديقي عمر

حنا عارفينك مزيان وعارفين بلي الصحافة مغتصبة وأنك مقبلتيش تكون مغتصب وساكت

عشيري عمر

برزطتيهم بقلمك الحر فضحتي الاغتصبات ديالهم

الأنظمة البوليسية كتستعمل نفس الطرق باش تسكت الناشطين لي معندهم فرانات ومكيعرفوش وما كيعتارفوش بالخطوط الحمراء

أول حاجة كيبغيو يشريوك بكل الطرق

حيت عندهم بوكو لعاقة

سارقين ثروات حلم شعب مغتصب لا حول له ولا قوة

ثاني حاجة تشويه السمعة

والثالثة ثابتة الحبس ولا المنفى

هاد شي إلى ما قتلوكتش ولا ما تصطيتيش

نرجعو لصالة العرض الصغيرة ونعاودو الفيلم من اللول بلا مونتاج:

المشهد اللول كيبدا بشاب ذكي وطموح وقادر يقول لا. هاد الشاب سميتو عمر. تولد فبلاد حاكمينها البيادق وحوش الغابة

العفاريت والجنون. ما هو مجرم ولا نصاب ولا مروج ديال الوعود الكاذبة. شاب عشق الصحافة، عشق الحق وعشق القلم. فهاد اللحظة خديت نترة عميقة من الجوان لي ساعة وهو طافي وفكرت: واش ممكن غا بقلم نواجهو كلشي داكشي؟ قلم ديال صحافي؟ قلم ديال رابور؟ قلم ديال كاتب؟ واش هادي معركة متكافئة بين اللحم والعظم؟ بين الريش والحديد؟ ما علينا. التجربة علماتنا بلي القلم سلاح وقادر يحرك العروش ويطيحها كاع. عمر عشق القلم ومور القلم كاينين جبال وبحور ووديان وضباب كيخبي الحقيقة. كاين الحبس وكاينة الموت ولكن كاينة حتى الحرية. عمر الشاب لي جاي من بعيد بوحدو أعزل وعنيد مشا واحد النهار للريف وبدا كيحفر فالمستور. عمر قرر يقول: لا. قرر يكون مع الشعب وهمومو. قرر يكون مع الفقراء ومع المظلومين ومع المعتقلين. قرر يكون جندي فيدو قلم يواجه بيه سبوعا وضبوعا، سلاح وأجهزة كبيرة ومخازنية كبار. عمر ماشي صحافي عادي، بل صحفي محقق، يعني صحفي نباش، صحفي مزعج، صحفي ضروري يوصلو النبيش ديالو للمو دباص ديال الفساد والاستبداد والحكرة. علاش تتضامن مع أهل الريف وعلاش تقول لا وعلاش تفضح شركات وتلاعبات واستغلال وتقول الحق فالأرض والسكن لكل مواطن وعلاش ما تبيعش الماتش وتلبدها بحال المئات لي باعوا؟ بغيتي الفلوس؟ هاك. شنو بغيتي؟ علاش كتقلب؟ واش معارفش المثل ديالنا لي كيقول: هبش تجبد حنش؟

لا.. عمر ما باعش الماتش، كمل طريقو وسط الغابة. وسط الضباب. وسط الخوف. واحد النهار غفلهم ودارها كبيرة بزاف. جبد سميات كبار بزاف متورطين فملف خدام الدولة. دار خدمة ديال المحققين الكبار. رقم عقاري قادو لمجموعة من الأرقام العقارية. لائحة كبيرة ديال سياسيين معروفين ستافدو من أراضي شاسعة فمكان استراتيجي بالرباط بالضبط بطريق زعير كلم 9، بثمن بخس. مستشارين لملك المغرب وكبار موظفي الدولة وزعماء أحزاب سياسية وحتى شخصيات أجنبية. لا بزاف هادشي عشيري عمر. راك حطيتي يدك على عش الدبابير. موحال يدوزوها ليك وموحال يكون فهاد الفيلم كتر من مشهد واحد..

المخزن يمهل ولا يهمل. كيطيب ليك الدواصا على المجمر. ختار المشهد لي بغيتي نكملو بيه الفيلم ونطلعو الجنريك: العمل لصالح أجهزة مخابراتية خارجية وتلقي دعم مالي منها، إهانة القضاء، السكر العلني والسب والشتم، أو الاغتصاب؟ كيبان لي أي حاجة فيها الاغتصاب، الجنس، المثلية، غتكون مناسبة أكثر وغتعطينا مشهد درامي مريكل مشوق ومثير وكيحبس الأنفاس. بزاف د الصحفيين شي خوا لبلاد وشي لبدها وشي مزال يحسب الايام ورا لقضبان ونزيدو عليهم عمر الراضي، والليستة باقا طويلة، لي طاح فالمقلة يتقلا.

ولكن بلاتي

الفيلم باقي شاعل أ عشيري

يقدرو يوقفو الفيلم ديالهم

الفيلم ديالنا باقي خدام

بزاف ديال الحوت قادر يقطع الشبكة ويهرب

يشدو حوتة تهرب حوتة

يحبسو مناضل.ة يتولد مناضلة

يقتلو حر.ة يتولد حر.ة

الحبس دايز دايز

حبس صغير وسط الحبس الكبير

ولفنا الحبس

ولفنا الموت